ໂດຍ Li Yingqing ແລະ Zhong Nan | chinadaily.com.cn

ທາງລົດໄຟຈີນ-ລາວ, ເຊິ່ງເປັນທາງລົດໄຟທີ່ຍາວກວ່າ 1,000 ກິໂລແມັດຈາກເມືອງຄຸນໝິງ ທາງຕາເວັນຕົກສຽງໃຕ້ຂອງຈີນ, ເມືອງເອກຂອງແຂວງຢຸນນານ, ໄປຫານະຄອນຫຼວງວຽງຈນຂອງລາວ, ຄາດວ່າຈະເລີ່ມໃຫ້ບໍລິການພາຍໃນທ້າຍປີນີ້, ອີງຕາມບໍລິສັດ China State Railway Group Co., Ltd, ຜູ້ປະກອບການທາງລົດໄຟຂອງປະເທດ.

ການກໍ່ສ້າງທາງລົດໄຟໄດ້ສຳເລັດໃນວັນອັງຄານທີ່ເມືອງເມີງລາ ຂອງແຂວງປົກຄອງຕົນເອງສິບສອງພັນນາໄຕ້ ເຊິ່ງຕັ້ງຢູ່ໃກ້ກັບທ່າເຮືອທາງບົກຕາມຊາຍແດນຈີນ-ລາວ.

ດ້ວຍຄວາມໄວທີ່ອອກແບບມາ 160 ກິໂລແມັດຕໍ່ຊົ່ວໂມງ, ການບໍລິການທາງລົດໄຟຂ້າມຊາຍແດນລະຫວ່າງສອງເມືອງດັ່ງກ່າວມີກຳນົດຈະເປີດໃນເດືອນທັນວາ. ເສັ້ນທາງການຂົນສົ່ງໂດຍກົງຄາດວ່າຈະຊ່ວຍຫຼຸດຜ່ອນເວລາເດີນທາງລະຫວ່າງສອງເມືອງໃຫ້ໜ້ອຍກວ່າໜຶ່ງມື້.

ທາງລົດໄຟທັງໝົດໄດ້ຮັບຮອງເອົາມາດຕະຖານເຕັກນິກທາງລົດໄຟຂອງຈີນ ແລະ ນຳໃຊ້ອຸປະກອນຂອງຈີນ. ປະຈຸບັນ, ການກໍ່ສ້າງທາງລົດໄຟ, ຂົວ, ອຸໂມງ ແລະ ໂຄງການທີ່ກ່ຽວຂ້ອງກັບພະລັງງານໄດ້ສຳເລັດແລ້ວ, ອີງຕາມຂໍ້ມູນທີ່ໄດ້ຮັບຈາກບໍລິສັດລົງທຶນທາງລົດໄຟແຂວງຢຸນນານ ຈຳກັດ ທີ່ຕັ້ງຢູ່ເມືອງຄຸນໝິງ ເຊິ່ງເປັນນັກລົງທຶນຫຼັກໃນໂຄງການດັ່ງກ່າວ.

ທາງລົດໄຟແລ່ນຜ່ານເຂດປະທະກັນຂອງແຜ່ນອິນເດຍ-ຢູຣາເຊຍ, ເຊິ່ງມີຮ່ອມພູ ແລະ ແມ່ນ້ຳທີ່ຕັດຜ່ານກັນ. ມີອຸໂມງ 167 ແຫ່ງຕາມເສັ້ນທາງລົດໄຟຈີນ-ລາວ. ຄວາມຍາວທັງໝົດຂອງອຸໂມງລວມກັນຫຼາຍກວ່າ 590 ກິໂລແມັດ, ກວມເອົາ 63 ເປີເຊັນຂອງຄວາມຍາວທັງໝົດຂອງທາງລົດໄຟ.